اهو اى كلام بيتقال ...

يا متولى هيَّ الحكومة قارفانا ليه؟؟؟ قالي: يا واد يا محسن الحكومة بتاعتنا عاملة زي ابوك كده وانت صغير ..مش انت ابوك كان بيضربك وانت صغير ؟؟ -إلا بيضربني انا ابويا ماكانش بيعرف يلعب دومنو ولا طاولة علشان كده كانت تسليته الوحيدة إنه يضربني بس اهو كان بيربيني- ايوااا عليك نور اهو الحكومة برضة بتربينا وتعلمنا الأدب علشان إحنا عالم قليلة الأدب يعني مثلا إحنا الشعب الوحيد اللي تلاقيه لا مؤاخذة بيعمل زي الناس في الشارع علشان كده إحنا ناقصين ادب والحكومة بتربينا - سألته : طيب وحنكبر أمتى يا عبد المعطي ما احنا لازم نكبر ونبطل نتربى . عليك نور ..اول ما تلاقي الناس لامؤاخذة بطلت تعمل زي الناس في الشارع وعرفت طريق دورات المياه يبقى إحنا اتربينا والحكومة تبطل تقرفنا - يعني تقريبا في المشمش يعني يا متولى - تقريبا يا اخويا يا محسن - تاني يوم كلمت سلامة توهان.. يا سلامة هيا الحكومة قارفانا في عيشتنا ليه؟؟!! اسكت يا محسن يا حاقد يامفتري انت بتكره الحكومة اللي هيا اجدع حكومة جت مصر انت شكلك شيوعي يا واد يا محسن - ليه هيَّ الحكومة بتاعتنا حلوة ولا ايه يا متولى؟؟ طبعا يا حاقد حلوة هوا فيه حكومة اجدع من دي دي حكومتنا باسطة الشعب على الآخر ومخلياه آخر روقان ...تعرف يا محسن إن فيه دلوقتي خصم 50% على اسعار الحشيش؟! ياااااه بجد يا سلامة؟؟!! طبعا يا جاهل زمان كنا نقطع المشاوير ونروح حتت ما يعلم بيها إلا ربنا علشان نجيبه لكن دلوقتي بقى فيه مورد معتمد على قمة كل شارع وتقولي الحكومة قرفانا دي الحكومة مكيفانا يا غبي - بعد كده كلمت عبود الله يقرفه ( هوا اسمه الشهرة كده ) قلتله يا عبود هيا الحكومة قرفانا في عيشتنا ليه؟؟؟ قالي : بص يا محسن تعرف الواد كعبوليا المجنون؟؟ قلتله : طبعا ده نص البلد تعرفه مش ده المجنون اللي بيمشي لا مؤاخذة بيتف ( يبصق ) على الناس في الشارع . قالي : انت لو وقعت في الواد كعبوليا ولا مؤاخذة ادالك دش سخن من بقه حتسأل هوا عمل كده ليه؟؟ قلتله : طبعا لا ده مجنون وماحدش يسأله بيعمل كده ليه. قالي : اهي الحكومة بتاعتنا كده عمالة تتف على البني آدمين وتقرفنا في عيشة ابونا وإحنا ما عملنلهاش حاجة... سؤالك صعب يا محسن لكن مفيش قدامك غير إنك تعمل زي ما بتعمل مع كعبوليا تاخد الدش من هنا وتمسحه من سكات وتغسل وشك بشوية مياه وتقول اصحاب العقول في راحة . ومن ساعة ما طبقت نظرية عبود الله يقرفه ( وده طبعا اسمه الشهرة ) بقيت مرتاح جدا ..اقف في طابور العيش واروح اغسل وشي مكان تفة الحكومة ...اتحشر في الأتوبيس ..واروح اغسل وشي في تفة الحكومة ...ده طبعا لو فيه ميه في الحنفية والمياه ما اتقطعتش وافضل قاعد لامؤاخذة ببركة الحكومة .