طبعا كنتم متوقعين من العنوان أن الصور تكون كلها سخريه من حال مصر زى العاده فى كل الرسايل اللى لها نفس العنوان . لكن أنا بالعكس حاسس أن مصر فى الفتره دى محتاجه حبنا أكتر ماهى محتاجه سخطنا وسخريتنا ولازم نتعلم نفرق بين كرهنا لظروف بلدنا وبين حبنا وأنتمائنا للبلد نفسها. مصر مش هى حسنى مبارك وحكومته الفاسده اللى لازم فيوم هايغوروا بأذن الله .مصر مش هى حالة الأهمال والامبالاه والفوضى اللى حاصله فى البلد دلوقت وعن عمد من الحكومه . مصر يا أخوانا هى طيبة أبوك وأمك هى صوت الشيخ محمد رفعت فى أدان مغرب رمضان مصر هى صوت أم كلثوم ساعة العصارى هى جدعنة أصحابك وطيبة جيرانك وعود سيد درويش ورباعيات صلاح جاهين وشعر فاروق جويده وموسيقى عمر خيرت مصر هى منظر النيل ساعة الغروب وشط أسكندريه ورملها . الناس اللى متغربين زيى أكيد حاسين بقيمة المعانى دى لأنها بعيده عنهم. مصر محتاجه حبكم دلوقت مش التريقه وخفة الدم اللى تفرح أعدائها لأن الجمال ده ليه أعداء كتير عارفينهم؟؟
أولا طبعا : أمريكا وأسرائيل وبالمناسبه الشيكل الأسرائيلى مازال عليه صورة خريطة دولتهم من النيل الى الفرات
ثانيا : حكومه فاسده هاتكون سعيده جدا لما ينتهى أنتمائنا للبلد ومانسألش فيها وبالعكس نساعد فى خرابها ولما تخرب خالص هايلموا القرشين ويخلعوا ومش هاينسوا يدخلوا اليهود قبل ما يخرجوا
ثالثا : للأسف أخوانكم العرب اللى بيغيروا من جمالها وتاريخها ونفسهم يشوفوها متساويه بالأرض وكل فكرتهم عن الشعب المصرى أن رجاله عساكر لازم يحاربوا ويموتوا عشان خاطر العرب وبعد ما يحاربوا برضو هايشتموهم ونسائه راقصات يرفهوا عن العرب حد فيكم ملاحظ مؤسسة روتانا اللى بتتعمد تتعاقد مع المطربين المصريين بمبالغ مهوله عشان بس تدفنهم وتمنع أعمالهم وتفرض علينا اللبنانى والخليجى؟؟ حد فيكم عارف أن الكويت بعد تحريرها رفعت كل أعلام الدول اللى حاربت عشانها ماعدا العلم المصرى؟؟ حد فيكم عارف المصرى فى دول الخليج بيتعامل أزاى؟؟
رابعا : أنظمه وأجهزة أعلام مشبوهه .قناة البى بى سى مستمرة فى بث برامج ملفقه عن أضطهاد المسيحيين فى مصر وبتقول أن البنت المسيحيه معرضه للسب والأهانه طول الوقت فى مصر لأنها غير محجبه !! شفتوا الكلام الفارغ
طولت عليكم الخلاصه: أكرهوا الوضع الحالى زى ما أنتم عايزين بس أياكم فيوم تبطلوا تحبوا مصر لأنكم ما تعرفوش تبقوا حاجه تانيه غير أنكم مصريين
الله يسعدك دنيا وآخرة ويجبر خاطرك
ردحذفزى ما جبرت خاطر البلد العظيم اللى اهله ذلوه واهانوه
ومش شايفين فيه غير الهم والغباء والتخلف
مع ان فعلا فى الدنيا مفيش زى بلدنا
هى بيتنا .... ومش حنسيبه علشان نعيش فى بيت الجيران الحلو النظيف
حنفضل صحاب بيت .. ننضف ونرتب ونضبط .... ومش حنبقى ضيوف ابدا فى بيوت خمس نجوم
فرحتنى .. الله يفرح قلبك
نعمت عوض الله
مستشار اجتماعى وتربوى
جزاك الله خير عن كل كلمة
ردحذفربنا يجعل بكلامك ده ناس تفكر صح في الوضع اللي احنا فيه
انا بكره اوي كل الناس اللي متسببة في الازمات الكتير اللي احنا عاشينها
اللي يفكر كويس في الحال اللي احنا عايشينه في مصر دلوقتي هيعرف كويس ان اللي بيعمل كده في مصر بيكرهها اوي اوي وعايز الناس تكرهها زيه نفسه مايشوفش فيها حاجة حلوة
انا مش بتكلم عن الناس اللي بتبعت الصور ولا عن اللي بيروجوا للصور دي
انا بتكلم عن اللي اتسبب ان يكون في صور زي دي
عارفين لما سافرت بره مصر في اوروبا قلت الله يااااااه لو مصر تبقى حلوه كده انا لو في ايدي كنت خلتها احلى بلد وبعدين اكتشفت ان اكيد المسئولين في بلدنا سافروا بره واكيد شايفين الفرق وهم اللي في ايديهم يغيروا الوضع لكن لسبب ما مفيش حاجة بتحصل
الفكرة دي خلتني اوصل لاستنتاج تاني ظريف بقى ان اللي بيحصل ده متعمد تماما وان ده تخريب متعمد من حد مبيحبش البلد ده ومش عايز حد يحبها
بس انتم عارفين ايه اللي احنا المفروض نعمله اننا نحاول نخليها احسن بكل طريقة نقدر عليها عشان اللي احنا في ده مقصود 100% ومش عشان احنا وحشين بيتعمل فينا كده لا ده عشان احنا بلد كويسة اوي بيتعمل فينا كده
محدش يديهم فرصة يخلونا منحبهاش ونزعل منها
بس انا عمري ما بطلت احب ولا هبطل احب تراب البلد دي
انا بعشقهااااااااااااااااااااااااااااا
علا
والله يا سيف كلامك جميل بس ياريت كل الناس تفهمه صح ومحدش ياخده على انه كلام وشعارات على الفاضى ونبطل بقى نكون سلبيين اكتر من كدااا ...
ردحذفالله ينور عليك والله ياسيف.
الاخ الفاضل /سيف الحق كلامك جميل ولماح بس مش عايزك تعمل زى النائب بتعنا يعنى اللى انا عايز اوصلو انك بتتكلم عن المغتربين بيتعمل فيهم اية والخلجيين مضبطنهم ازاى وكلام من دة احنا هنا فى البلد اهوة كلها كام يوم مش هنلاقى المية نغسل بيها وشنا ولا حياة لمن تنادى بالنسبة للنائب بتعنا زى ما طلعت بقى بردو بسيب الراس ويمسك فى الديل زى ما بيقولو ازاى يعنى بيسب المشاكل بتاعت الدايرة ويقول فلسطبن والعراق وكانو لسة فاكر اننا الجمهورية العربية المتحدة فا انا مش عايزك يا استاذ سيف الحق تبقى شبيهة لية والا تبقى مصيبة من الاخر كدة وعلى بلاطة عايزين نتكلم فى اللى يخص البلد من عند الكتيبة لغاية بنزينة الفار هيا دى بلدنا اللى برة بيشرب بارد وحليب وبياكل موز وبياخد للكافيل من هنا كام جوز حمام على كلم كيلو مانجة وببيبقى قرفان مع انة بيروح يبوس على ايد الكفيل هنا وهوة رحتو معفنة وناقص يقولو يا مولاى وبيجى يعمل فيها الباتشينو هنا فى البلد والجلبية البيضة وبتاع ولو احتاج شيكارة دقيق هايروح يجيبها من اسكندرية الفلوس موجودة والمية بيبعت يشترى من المائدة كراتيين مية معدنية يا رييت نبص للبلد وما علينا من الاخوة المغتربين للمرة الاخيرة والله فى ناس بتشترى جرار المية ب 120 جنية وانا منهم وفى ناس عمرها
ردحذفمع احترامى للاخ سيف الحق انا مع الاخ ( العائش على الهامش ) وبكرر ياريت نتكلم على الانفااااااار اللى مررررزوعه فى البلد قصدى اللى موجوده فى البلد واللى الاخوه المغتربين اللى انت بتتكلم عنهم دول قبل مايروحو عارفين اللى هيتعمل فيهم كويس .. دا ياراجل لما بيشمو خبر ان فى كافيل كويتى او ليبى فى البلد جاى يعمل عقودات بيتوفو حواليه كانه الملك فاروق فى زمانه ... واللهى حاجه تقرف بجد. والواحد لو اخد سناره وراح طعم فى المينا هيعرف يوكل نفسه وزى مابيقولو البلدى احسن من غيرها واللى طلع من داره انقل مقداره.. دا البلد بقت مليانه عربيات من الدقهليه ودمياط بتبيع ادوات منزليه وبتيجى مليانه وبترجع فاضيه...!!!!!!!!!!
ردحذفاشكركم على الردود التى اثلجت صدرى ودية كانت رسالة من متغرب ارسالها لبريد المدونة وطلب منى نشرها مشكورين على الردود
ردحذفالسلام عليكم ورحمة الله وبركاته
ردحذفرغم اننى نويت من ايام ان لا اكتب فى هذه المدونة وان اقتصر على كونى احد القراء اليوميين لها باعتبارى ابنا من ابناء هذه البلد الطيبة الا ان رد بعض الاخوة وحديثهم عن المغتربين دعانى لان اكتب هذه الكلمات
الاخوة الافاضل
الاخوة المغتربين فى الخارج ليسوا جميعا يقبلون ايدى كفلائهم .... بل فيهم من عنده كرامة وكفيله يكن له كل احترام ويثق فى أمانته مع كون هذه النوعية من الكفلاء قلة ...
ثانيا : الاخوة المغتربين خرجوا من بلدانهم لأنهم يعانون مما تعانون منه من ضيق المعيشة وأنا اكاد اجزم أن كاتب هذه الكلمات لو وجد فرصة عمل باجر جيد واناس تقدره لن يتردد ولو للحظة فى السفر .
ليس كل المغتربين يا اخى مهانين ... ولو نظرت حلوك فى بلدتك لوجدت من الشخصيات التى توقرها انت الكثير يأتون فى الصيف لقضاء أجازتهم ولا يتكبرون ولا يتفشخرون كما تدعى ...
الامثلة السيئة موجودة والمحترمة موجودة فلا داعى للتعميم والزج بالمغتربين فى ساحة مشاكل البلد .
وايضا من هؤلاء المغتربين من هو مهموم لحال البلد لأن مرجعه لها بعد عام أو عامين أو عشرة أعوام . ويتألم مما يسمعه من معاناة الناس .
وقد جلست فترة مع اخوة مغتربين مثلى نفكر فى عمل مشروع كبير فى برج البرلس يضم اكبر شريحة من الشباب للعمل . واقترحنا بعض الاقتراحات ولكن كما يعلم الجميع ان مشاريع مثل هذه تحتاج لتنظيم ودراسة متقنة حتى لا تبوء بالفشل .
وكان من ضمن الاقتراحات انشاء حلقة سمك مركزية فى برج البرلس تتعامل مع كل الصيادين وتشترى منهم السمك بافضل الاسعار على ان يكون ربح الحلقة هامش بسيط لكى تجذب اكثر العملاء لها وتبيع مباشرة فى الاسكندرية والقاهرة لاننا كما نعلم ان الصياد هو اقل انسان يحصل على مكسب من الاسماك التى يصطادها وان هامش الربح الاكبر يكون للتاجر الجشع وغالبية تجار بلدتنا جشعين .
وان يقوم على الاشراف على البيع اكثر من فرد حتى نتجنب السرقة واكل حقوق الصياد.
ولو تحسن حال الصياد فى بلدتنا ستتحسن معه اوضاع كثيرة حيث ان الصياد هو المحرك الرئيسى لكل المجالات فى بلدتنا .
وكان هناك افكار كثيرة وجيدة للتنفيذ ولكن الوضع السيىء فى بلدنا مصر يجعل كل من يريد المساهمة فى مشاريع كبيرة يتردد اكثر من مرة بسبب ما تعانيه البلد من ارتباك سياسى واقتصادى .
يا اخوة لو كانت مصلحة البلد لا تهمنا ما كنا نشارك معكم بالرأى فى هذه المدونة ...
الاخ العزيز المغترب
ردحذفانا لست معك فى موضوع ان روتانا سينما بتتعاقد مع مطربينا علشان تدفنهم
ولا ان الفن ده قضيتنا فى الاساس
الفنانين بتوعنا دول اللى فاضحينا فى كل العالم العربى لانهم بقلة ادبهم اعطوا فكرة عن المصريين انهم كلهم زى عادل امام الخمورجى واعطوا فكرة عن نساءنا انهم زى فيفى عبده كلهم راقصات .
حتى صار الخليجيين لما يشتوا المصريين يقولون لهم يامصرى يابن الرقاصة... يابن فيفى عبده
ناهيك عن باقى الشتائم
طبعا مش كل الفنانين كده لكنهم ممن اسهموا فى نشر سمعة سيئة عن مصر حتى صار غالبية الخليجيين بينزلوا مصر علشان يسكروا ويرتكبوا الفضايح والمحرمات بسبب الصورة اللى واخدينها عننا.
باقى الموضوع جميل جدا ورسالة صادقة من الاخ المغترب وكلنا نشعر بما يشعر به تجاه بلدته .